استفسار عن حقوق الزوجه
السلام عليكم ورحمة الله وبركاته
بغيت اسألكم اخواني عن حقوق الزوجه اذا تزوج عليها زوجها
هل من حقي ان اطلب ما يلي :
1- بيت خاص فيني << وهل لي ان اطلب انه يكون باسمي والا؟ اذا كان الزوج قادر انه يشتري بيت
2- خادمه
3- سائقه (دريوليه) اتكون خاصه فيني وفمشاويري .. هل لي أن ارفض ان السائقه تكون مشتركه بيني وبين الثانيه لاني ما ابي اي شي يربطني فيها ولا ابي تكون بينا اي علاقه فبعض
4- ان ما يكون بينا اي علاقه فبعض ما ابي اشوفها ولا تشوفني ولا اتشوف عيالي ولا لها خص فيهم
5- في اليوم الي يكون زوجي عندي ما تتصل ولا اتطرش مسجات الا للضروره القصوى << مريضه مثلا او طايحه في مشكله هي او اي حد من عيالها او اهلها ولازم ريلي يتدخل
6- مابي اعرف اي شي عنها ولا عن اخبارها وانه ما يتكلم عنها جدامي ابد ويوم يكون عندي يعني ينسى ذاك البيت والي فيه (صحيح مستحيل بس مب لازم انسولف عنهم ابد)
7- اذا في يوم من الايام زعل مني او صارت بينا اي خلافات ما يروح عندها واذا صارت بينهم اي خلافات ما ايي بيتي كل بيت تنحل خلافاته فيه من دون ما اصحاب البيت الثاني يعرفون عنها
8- مصروفي ومصروف عيالي يوصلي من دون انقطاع مهما كانت ظروف الثانيه وهي من ناحيتها نفس الشي مهما كنت محتاجه ما يحرمها من مصروفها ولا يقصر عليها بسبب حاجتي للمال
هل هذي الطلبات من حقوقي الشرعيه والقانونيه؟؟؟؟!!!!!
واذا لي اي حق اخر غفلت عنه الله يخليكم نبهوني ... لان نفسيتي تعبانه وايد ومب قادره اركز عدل على اي شي
الله المستعان
واذا لا قدر الله حصل طلاق امبينا .. هل يكون لي الحق بطلب
1- بيت يلمني وعيالي .. علما بان بيت اهلي مافيه مكان لنا بيتهم صغييير والعائله كبيره ياالله مكفنهم البيت ربي يفرجها
2- هل لي دخل من صوبه؟؟ والا لازم اعتمد على راتب الشؤون فقط؟
وشو ممكن للمطلقه انها تطالب فيه
ربي يبعد الطلاق عن كل المسلمين ويكفينا بالحلال عن الحرام يااارب
ومشكورين ربي يسعدكم
في انتظار ردكم سريعا