عزيزتي الغالية غموض ... لك كل الشكر على دعائك الطيب ... جدا فرحتيني وعسى الله يهوّن على الجميع يا رب
القيسي وعليك السلام ورحمة الله وبركاته .. اخوي بكون في قمة الصراحة معاك .. مب من حقي الانساني ان تصان كرامتي كإنسانه بدون ما احتاج اكون على ذمة رجل؟ هل من الاساسي أن أكون على ذمة رجل حتى تصان كرامتي؟ ماذا لو لم يكن شخص "تقي" ... هل سيؤول بي المطاف لعيش نفس المعاناة؟ هل هذا فيه عدل ومساواة؟
اخي متعب محمد الشهم الكريم ... في البداية عسى الله يكثّر من امثالك ويسخرّك لكل محتاج .. ويا رب يجعل شهامتك هذي في ميزان حسناتك ويسعدك ويفتح عليك ...
ممكن وماعليك ايّ امر اتخبرني اكثر عن الحماية القانونية والاجتماعية الي كفلها لي القانون الاماراتي؟ شو حقوقي في هذي الحالة بالضبط؟ كيف بيحميني القانون في هذي الحاله؟ اخوي بكون صريحة معاك .. جدا جدا صعب على البنت تقدم شكوى في هذي الحاله .. خوفا من الفضيحه ... مب من السهل ان تشتكي البنت على ابوها وترفع عليه قضيه وتنفضح بين الناس الي ماراح تنسى .. وهالامر يخلي اي بنت تتردد مليون مرة قبل عن تقدم على هذي الخطوه وخاصة في مجتمعنا ... ارجوك يا اخوي خبرني عن المعلومات اللي اتعرفها عن الحماية الي تقدمهاالدولة لنا من هالظروف المؤسفه .. تدري ليش انا طرحت الموضوع .. لاني حابة اعرف شو حقوقي في حال لا سمح الله اضطريت ألجأ للقانون .. اخوي انا ساعات خاصه بالايام الصعبه تعذبني الوساوس وايد .. اخاف ان حد بيضرني وخاصه من رجال عائلتي .. وشو ممكن ايي مع بكره .. فمعرفتي لحقوقي بتعطيني شيء من الامان بتعطيني قوة وما بتخلي هالوساوس اتسيطر علي
المحامي مؤمن صابر هشام وعليك السلام ورحمة الله وبركاته .. اخوي الكريم انا مسامحتنّك على تشكيكك في كلامي .. ولن اقول حسبي الله ونعم الوكيل بل الله يسامحك وينوّر بصيرتك ... وعسى الله يهدي من يسمح له ضميره بتلفيق مثل هذي هالامور .. اخوي اصبت في قولك جني مصلحة .. المصلحة الي احاول اجنيها هي صون كرامتي وهذا اتوقع من ابسط حقوقي كإنسانه كرمني الله عز وجل قبل ان يكرمني ايّ بشر
اناشدكم من هذا المنبر وعسى الله يجازي الي أسس هالموقع كل خير ويفرّج عليه كل هم ... اناشدكم من كل قلبي يا نساء ورجال القانون ان تتحدثون اكثر في هذا الموضوع .. مادري يمكن انا غافله عن حقوقي .. يمكن بالفعل يتم التحدث عن هالامور ومعروفه حقوقنا كنساء إماراتيات من هذي الناحيه .. لكن انا بكل صراحة ماعندي اي فكره .. بس والله العظيم في بنات يعانون وايد ومشكلتهم حتى اكبر من المشكله الي مريت فيها .. الحمدلله, الله الكريم عطاني القوة ووقفتهم عند حدهم .. ومع ذلك ما اقدر اوصف الالم الي احس فيه بقلبي من هذا الي مريت فيه .. احساس فقد الامان فقد الثقه احساس جرح ينزف بداخلكم ما ينبرى مع الايام .. تتناسونه .. عشان تقدرون اتكملون حياتكم عشان ماتخلون مصاعب الحياة تدمركم وتسرق منكم حقكم بالحياة .. لكن بالايام الي تضعفون فيها بفعل ضغوطات الحياة وينهككم المسير .. تصعد هذه الالام مرة اخرى للسطح وتعود تؤلمكم بشكل مبرح .. كل هذا الالم وانا وقفتهم عند حدهم في كل مرة .. لكن مب كل بنت تقدر توقف المعتدي الظالم عند حدّه .. وما اقدر حتى ابتدي اتخيل حجم الالم المهول الي ممكن تحس فيه من هي بهالموقف ومب حتى قادرة تدافع عن نفسها .. وايد بنات حقوقهم وكرامتهم مهانه للاسف ويموتون مليون مره كل يوم بسبب ما يتعرضون له من ظلم .. وهم مب عارفين شو حقوقهم وكيف ممكن يتصرفون في هذا الموقف الي بالفعل مرير وأليم .. الله عطاكم العلم والدراية القانونية فأرجوكم كونوا صوت للمظلوم الي حتى مب قادر يوصل صوته لأسباب اجتماعيه كثيره ولا حتى عارف ان له حقوق