عندي مشكله اتمنى حلها

[ظبياني خطير]

السلام عليكم ورحمة الله وبركاته
علومكم اخواني وخواتي الاعضاء الكرام

الموضوع شركة التأميين

الله يسلمكم ويطول بعماركم انا مشترك في شركة تأمين يعني اودع عندهم فلوس وهم يستثمرونها
بعد فتره فنشت من الدوام عسب اني بداوم مكان ثاني
انا دافع لهم حوالي 28 الف واخوي الصغير نفس الشي بس اقل من المبلغ
ورحنا كنسلنا العقد عسب استرجع المبلع اللي عطيتهم عندي ورقه نفس الورقه اللي عند اخوي مكتوب فيها المبلغ اللي لازوم يردونه لنا اخوي الصغير حصل المبلغ كامل تقريبا 17 الف درهم
وانا اللي دافع لهم 28 الف مطرشين شيك بقيمة 7 الاف درهم فريت الشيك فويهم وطلعت وين راحت فلوسي هذا نصب الصراحه يعني استثمرو لفلوس واستفادو منها ويوم ييت اكنسل احصل 7 الاف والـ28 طار فالجو المفروض احصل اكثر من 28 الف لانهم استثمرو المبلغ والمبلغ عندهم من 7 سنوات واخر شي 7 الاف درهم والمشكله قعدو يعاندون بعد انا ماطلبت الفوائد مع المبلع انا اللي طلبته 28 الف بس وعندي ورقه اقرار منهم بانهم يعطوني المبلغ 28 الف وتوقيع مديرهم

ما اعرف شو اسوي وهل يحق لي مطالبتهم بالفوايد

اتمنى انكم اتفيدوني
ابي حد يتكتبلي مذكره بالانجليزي اعطيهم اياه اذا مادفعولي المبلغ برفع عليهم قضيه وان عندي اقرار من عندهم انهم يدفعولي المبلغ
ولكم مني خالص الشكر والتقدير والاحترام
اخوكم
ظبياني خطير

[روح القانون]

مرحبابك أخوي ظبياني خطير بين اخوانك وخواتك وتسعدنا مشاركتك وثقتك فينا :)

بالنسبة لاستفسارك

انته تقول عطيت شركة تأمين بيزات عشان تستثمرها، والاستثمار مب من أنشطة شركات التأمين، هل عندهم ترخيص بهالشي ؟

ياريت توضحلنا نوع الاستثمار، محفظة ولا شو

وكبداية هدي اعصابك أخوي وكلمهم ودياً يمكن مغلطين وياك لا سمح الله بدليل تقول رجعو بيزات أخوك، واذكرلهم هالشي
وإذا طلعو متعمدين ينقصون المبلغ اسمع مبررهم وإن ما عجبك نرجع لورقة التعاقد

لكن مهم جداً نعرف مدى صلاحية ممارسة شركة التأمين لهالنوع من النشاط
والعقد الي كتبته كان فيه إشارة إلى نسبة الفوائد ولا لاء؟

وهل في عبارة في العقد فعلاً تقول إنهم أقل شي يرجعولك المبلغ الي دفعته ؟!
لأن عقود الاستثمار عموماً فيها بند يفيد بأنك تتحمل الربح والخسارة << يعني عااااادي جداً يقولك والله ما ربحت الشركة

ياريت ماعليك أمر أخوي تعطينا تفاصيل اكثر عشان تكون إجابتنا محددة وشافيه ان شاءالله

[ظبياني خطير]

مرحبا الساااع بختيه روح القانون
اشكرج ع هالترحيب الغاوي يعطيج العافيه
بالنسبه لشركة التاميين هي معروفه في دبي في فرع افبوظبي
انا واخوي مسجلين وقالو ان مدة العقد 15 سنه ع كلامهم
بس الغريب ختيه ان كنسلنا العقد مع بعض والورقه اللي معطينه نفس الورقه اللي عندي
وطرشت الورقه لمحامي ع الفاكس وقراها وقالي الورقه اقرار من عندهم انهم يردولك مبلغ 8 الاف دولار يعني 28 الف
بس انا انصدمت الشيكين يو مع بعض اخوي اقل عني وانا اكثر منه دافع انا احصل 7 الاف واخوي 17 الف ردوله المبلغ اللي دافعنه مايستوي
يعني فلوسي استثمروها واستفادو منها وانا طلعت مقصه

[روح القانون]

عشان جذي أخوي أقولك راجعهم عادي يكونون مغلطين << بما انهم شركة كبيرة ومعروفة ما بتستهبل على مبلغ بسيط

خاصة وإنك استثمرت في نفس الفترة الي أخوك استثمر فيها ، يعني نسبة الأرباح الي حصلها لازم تحصلها بحسب المبلغ الي حاطنه ، وبما ان اخوك رجعوله بيزاته مثل ماهي يعني لا ربح ولا خساره، يعني انته أقل شي تطلع ببيزاتك الي دفعتها .

عليك بالطرق الودية قبل المحاكم .. وبانتظار البكس يطيح قصدي المستجدات معاك اخوي ^ ^

[ظبياني خطير]

المشكله ختيه ولا عربي بينهم كلهم هنود كان في عربي اختفى شكله فنش
بس عنديه سؤال ختيه روح اذا الورقه اللي عندي اقار منهم انهم يردولي المبلع هل اني بكسب القضيه او انهم بيكسبونها تدرين مكاتب التأمين عندهم مليون محامي

[شرطية قانونيه]

أخوي ظبياني...مثل ما قالت لك اختي روح القانون..يمكن مغلطين..و لازم تحاول تتفاهم مع المسؤول بوديه ...وبرغم انها شركه كبيره و معروفه ما بضيع سمعتها مع عملاءها..فتأكد منهم

[روح القانون]

المشكله ختيه ولا عربي بينهم كلهم هنود كان في عربي اختفى شكله فنش
بس عنديه سؤال ختيه روح اذا الورقه اللي عندي اقار منهم انهم يردولي المبلع هل اني بكسب القضيه او انهم بيكسبونها تدرين مكاتب التأمين عندهم مليون محامي

ماعليك أخوي من بعض الشركات ، تكون كبيره ولها سمعه في السوق لكن والله القضايا الي عليهم مالها عدد

حاطين محاميين راقدين

وعن وضعك وضحتلك إن الورقة عبارة عن إقرار كتابي << أقوى دليل إثبات

ومافي شي يخوف بالعكس وضعك ممتاز بالنسبة لهم ، توكل على الله بس

لكن قبل المحاكم حاول تكتبلهم خطاب موقع منك يعني مثل ما تقول طلب رسمي بمعالجة الوضع عشان يوم تروح للقضاء بيقولك انته ما حاولت بالطرق الودية أو الإنذار أو التنبيه أو غيره .. وبيعطلونك